Олон улсад хуучны хэллэгээр бол баруунизм, американизм ноёлсон энэ үед дэлхийн тэргүүлэгч гүрнүүдийн анхаарлын төвд байнга ордог орнуудын нэг бол Хойд Солонгос. Тус улсын тусгаар тогтнолын өдөр өнөөдөр болж байна.

Олон жилийн турш эх газрын гүрнүүдээс хаалттай, нуугдмал оршиж байсан жижиг арлынхан үзэл суртлын зөрчилдөөнөөс болж, дайн хүртэл өдүүлж байсан билээ. Харин Солонгосын дайн дууссаны дараа жил бүрийн есдүгээр сарын 9-нийг Хойд Солонгосчууд тусгаар тогтнолын баяр болгон тэмдэглэх болжээ.

Монголын үйлдвэрчний эвлэлийн ерөнхийлөгч С.Ганбаатар удахгүй үнэгүй лекц уншиж, иргэдэд үгээ хэлэхээ зарлаад байгаа. Үүнтэй зэрэгцээд УИХ-ын дарга Д.Дэмбэрэл Японы үйлдвэрчний эвлэлийнхний үгийг сонслоо.

Уулзалтаар Японы үйлдвэрчний эвлэлийн байгууллагын төлөөлөгчид үйл ажиллагаагаа түүнд танилцуулсан юм. Мөн Монголын үйлдвэрчний эвлэлийн холбоотой хамтран ажиллаж байгаа туршлагаа УИХ-ын даргатай хуваалцлаа.

Төрийн ордонд өнөөдөр 14.00 цагаас Монгол Улсын Ерөнхийлөгч Ц.Элбэгдоржид  Канад Улсаас Монгол Улсад суух Онц бөгөөд Бүрэн эрхт Элчин сайд Грегори Гоулдхоук, 15.00 цагаас Кувейт  Улсаас Монгол Улсад суух Онц бөгөөд Бүрэн эрхт Элчин сайд Мубарак Мохамед Фалех Аль-Сехайжан нар тус тус итгэмжлэх жуух бичгээ өргөн барихаар болжээ.

Өмнө нь ажиллаж байсан Канад Улсаас Монгол Улсад суух Онц бөгөөд Бүрэн эрхт Элчин сайд хатагтай А.Биолик 2008 оноос Канад Улсаас Монгол Улсад суух Онц бөгөөд бүрэн эрхт Элчин сайдаар ажилласан бөгөөд урьд нь ОХУ-д Ерөнхий консул, Казахстан Улсад Онц бөгөөд бүрэн эрхт Элчин сайдаар ажиллаж байсан дипломатч байсан бөгөөд саяхан нутаг буцсан юм.

Ардчилсан эмэгтэйчүүдийн холбооны тэргүүн асан Б.Дэлгэрмаа өөрийн хүсэлтээр тэргүүнээсээ чөлөөлөгдөөд удаагүй байгаа билээ.

Тэрбээр тус холбооны тэргүүн байхаа болиод кино хийж байгаа аж. Б.Дэлгэрмаа аавынхаа "Зам" нэртэй алдарт романаас сэдэвлэн 30 ангит кино хийхээр төлөвлөн ажилдаа орсон сурагтай.

Энэхүү киног бүтээх санхүүжилтийг "Норовбанзад" сангаасаа гаргаж буй гэнэ.

Хамтарсан Засгийн газар хоёр дахь жилийнхээ ойтой золгож байна. Эх орны хишиг, Эрдэнийн хувийг амлаж гарч ирээд амлалтаа биелүүлэхийн тулд хамтран засгийн эрх барьж байгаа хоёр намын хувьд бүрэн эрхээ хэрэгжүүлэх хугацааны тэн хагас нь өнгөрчихлөө гэсэн үг. Тэгээд ч хамтарсан Засгийн газрын зарим гишүүд байр сууриа бэхжүүлэхийн тулд хийсэн ажлынхаа тайланг тавьж эхлээд байна. МАХН-ын гишүүнчлэлтэй сайд нар тэргүүлэн.

Сүүлийн жилүүдэд төрөөс дэд бүтэц, уул уурхай, боловсруулах үйлдвэрийг хөгжүүлэх зорилгоор томоохон бүтээн байгуулалтын ажлыг өрнүүлж эхлээд байгаа билээ. Гэвч эдгээр төсөлтэй холбоотойгоор маргаан гарч болзошгүйг харгалзан Монгол Улсын эрх ашгийг төлөөлөн, гадаад орны шүүх, арбитрт нэхэмжлэгч, хариуцагчаар оролцох,  цаашид шинээр хэрэгжүүлэх томоохон төсөл, хөтөлбөрийн  хүрээнд гэрээ, хэлэлцээр байгуулахад эрх зүйн туслалцаа үзүүлэх үйлчилгээг олон улсад нэр хүнд бүхий туршлагатай зөвлөх компаниар гүйцэтгүүлэх  шаардлага байгааг харгалзан, Засгийн газрын ээлжит хуралдаанаас өчигдөр зөвлөх компани сонгон шалгаруулах тухай тогтоол гаргасан байна.

УИХ-ын гишүүн Ж.Энхбаяртай ярилцлаа.

-МАХН нэрээ сольж, хувьсгалт гэдэг тодот­голоо халах нь. Үүнийг та хэрхэн хүлээж авч байгаа вэ?

-Нийгэм өөрөө их хол явчихсан. Улстөрийн нам гэдэг нийгмийг өөрөө ман­лайлж, хойноосоо дагуулж,  удирдан чиглүүлж байдаг. Энэ бол нэр солих тухай асуудал биш, сэргээх асуудал. 1921 онд үндэсний тусгаар тогтнолоо байлдан олж аваад Ардын засгаа байгуулж,  Мон­гол Ардын нам гэж нэрлэсэн.  Тэр нэр томъёо,  түүхэн уламжлалаа сэргээх тухай асуудал л хөндөгдөж байгаа.  Миний хувьд хэлэхэд намын нэр Ардын нам байж,  ард түмний засаг байх хэрэгтэй байна.

 “Байгаль орчны шинэчлэл-2” төслийн талаар хэлэлцэх гурван талт уулзалт өнөөдөр боллоо. Уулзалтад Байгаль орчин, аялал жуулчлалын дэд сайд, төслийн удирдагч Ч.Жаргалсайхан, Дэлхийн банкны Байгаль орчны төслийн зохицуулагч Тони Виттен болон төслийн ажилтнууд оролцож, 2010 оны тайлан, 2011 оны ажлын чиглэлийн талаар хэлэлцэв. Манай улсын байгаль орчны салбарт хэрэгжүүлж буй томоохон төсөл, хөтөлбөрийн нэг болох “Байгаль орчны шинэчлэл” төслийн хүрээнд 2006 онд зургаан сая ам.доллар, 2008 онд таван сая ам.долларын буцалтгүй тусламжийг Нидердландын Засгийн газраас хэрэгжүүлжээ.

УИХ-ын намрын ээлжит чуулганы нээлт ирэх аравдугаар сарын 5-нд болно. Чуулганы нээлтийн дараа, аравдугаар сарын дундуур УИХ-ын хүндэтгэлийн чуулганыг хийхээр бэлтгэл ажилдаа орсон байна. Монгол Улсад байнгын ажиллагаатай парламент үйл ажиллагаагаа эхэлсний 20 жилийн ойд зориулсан хүндэтгэлийн эл хуралдаанд Улсын Бага Хурал, үе үеийн УИХ-ын гишүүнээр сонгогдож байсан 260 орчим хүн, Ардын Их Хурлын депутатуудын төлөөлөгчид, Тамгын газарт ажиллаж байсан ахмадууд, хэвлэл, мэдээллийн ажилтнууд урилгаар оролцох ажээ.

МАХН-ын Бага хурлын долдугаар хуралдаанаар намынхаа их хурлын товыг зарласан билээ. Тэгвэл хоёр сарын дараа хийхээр товлосон их хурлын бэлтгэл ажил өнөөдрөөс эхэлж байна. Төрийн ордонд одоо их хуралд бэлтгэх ажлын хэсгийн хуралдаан болж байна. Монгол Улсын Ерөнхий сайд, МАХН-ын дарга Сү.Батболд, ерөнхий нарийн бичгийн дарга У.Хүрэлсүх, Удирдах зөвлөлийн гишүүд, УИХ дахь МАХН-ын бүлгийн ихэнх гишүүн уг ажлын хэсэгт багтжээ.